Paris se pripar velyoni: CPDN 183

Paris endar se pripi po festi Natal. Nel Champs-Elysées, los riverbilos arbadar kon koketeso un kolanet de rub kandelos. Nel Martokamp, l Eiffeltor abrigar matre in sa giron un abyo treis metros alta. In os strados, abyos bordar an shak pediraro. Epe toye, los vitrelos del ristorantos sar koprat de vat e de kartocos invitandas velyoni.

Los presyos del menuhs no subar un muy sensibla pluado raporte pasanyo. Zi gar da 2. 500 frankos nel let ristorantos us 12. 000 frankos nel establos de granlux. Medye, zi se situar inte 3. 500 e 6. 000 frankos. Lo menso komportar a et tarif tot tradisas platos: ostros, alba budin, dindin al maronos, grasep, olsul, toeto arozat pe shampanyo. Ofeste menuh mindar vinos e sirvo inse.

Nok etanye, los travelagenturos propozar num sorpren-velyonos ab 5. 000 frankos. Ik, po 6. 000 frankos, so se vidar invitat a un « spektaklo in un parisa teatro » folgat pe un « cen in un tipa ristorant de Montmartre ». Ye, so sujelar, kon gran rifort de prospektelos, un pranso in un albergo d Ile-de-France, plazelat pe un konkurso de hulahup.

So vidar same parsi un os formul: lo turista velyon, ki lokedor mede un itinerel ki dukar a Alzaso (19. 900 frankos), a Brusel (15. 500 frankos) o a Provenso (19. 900 frankos).

Nel ento, l amatoros de sorpren-velyonos sar min numas as in 1957 (cir un trim mine). Sar, so stimadar, lo rizult d un evolvo enselat dep som anyos: so celebrar Natal in f amilyo, so exar plu vole pol Sansilvestro.

(« Le Monde », 24 decembro 1958.)