9/05/2010

ANTONIO FRADELETTO: RMON 105

Mi ir lo canso d'i as profesor Venezye, yo dim seklo, Antonio Fradeletto

Et nam nokonat exe Italyo. E, uske Italye, exe Venezye, nur pokunos servar nok la soven.

Venezye, la nam nok venerat, e so no ye oblar k'il sir lo kreer e Palmer del fama Artos-Bianya, jat depdan un instituo de monda rison, ki adar nok, es eto posibla, al nokomparibla lustro d'et urbo unika mondye.

Fradeletto sir profesor, deputun, senator, ministro. Il sir surte lo plu gran itala orator de sa temp.

Dok no a et titlos mi venar uldi oje, mo al vir selfa, al vir admirenda k'il sir.

Fradeletto sir un trovul. Abandonat je sa naso al pordo del Ospital della Pieta, elevat pe zorgo del Publasist, l'infan rivelir sun un exepa talent. Infolge, van lo rimarkenda qalos del adolun atirir atenso on il, la patro ofrir le rikoni e l'elpi forfolgi la studos; mo l'infan, ofendat pluye qam onorat pe un gesto tan tardema, rifuzir fyere amba elpo e nam d'et patro sodene penta, prifande servi sa nam de trovul (venezyale 'Let Frat') e it ilustri nur pe sa meritos.

Eto no tardir. Apene exat da adol, il ja eblir lo publo pe sa konferensos pril defesta subjekos, firmande ete sa gran qalos d'orator.

Sun il axedir a tot onoros e toyuna il konir glor. La aktiveso faktir on tot domenos, e nil kauzo nobla le lir indiferenta. Mo il sir pretote, as la amik Riccardo Selvatico, poet e mayor, lo gran inamorat de sa lib Venezyo, po keo il sentir, nel ukocos de sa kor, un sarto senenda.

Inte lo sovenos d'et maestro nooblibla, mi servar lo d'un rentrado-diskorso, korse keo il ne dicir proxele eto: "Vu u ki nok intakta lo patri-mon de yuno-ideal, e dey kor vibrar po to bela e elevat, ve promu des nun resti fidela a vuself korse lo veo de va viv. Eto no iza, lo destin d'om sande, vey, degeneri da kompromado a kompromado. Mo il ki riusor se salvi konor plu tarde lo joy e lo fyereso de retrovi in sa kor sa yuneso".

Et vortos, pronuncat pel Maestro kon la bel vok posa e armona, gir rexe a ma kor e ye restir glifat po sem. Zi m'elpir in plul cirkonsos e kontribir certe me fi ami viv.

Oje, miself oldijat, mi adresar a ma lib Maestro un penso greda e emovat.

A. Alfandari. 

No comments:

Post a Comment