9/05/2010

LO MONT-SERMON: RMON 95-103

(San Mateo. ) 

5)
  1. Vidinde lo ful, Jesu ashendir un mont: ye sidinde, la dishiplos venir a il; 
  2. E il aprir sa bok, e ze ensenir, dicande: 
  3. Ixa lo spirtopovas, den zia lo cela royado. 
  4. Ixa zi ki dolyar, den zi sor konsolat. 
  5. Ixa l'umilas, den zi eredor lo ter. 
  6. Ixa los ki ongar e sefar po justis, den zi sor satisfat. 
  7. Ixa lo barmas, den zi obtenor gnado. 
  8. Ixa lo kor-puras, den zi vidor Deo. 
  9. Ixa lo paxifas, den zi sor namat filyos de Deo. 
  10. Ixa zi ki persekat kauze za driteso, den zia lo cela royado. 
  11. Ixa vu, van vu sor injurat e persekat, e van so dicor false tosorta mal pri vu kauze mi. 
  12. Vu siu glada, extreme glada, den grana sor va rikompenso in cel; den ete so persekir lo profetos ki venir pre vu. 
  13. Vu lo sal del ter, mo es sal perdur sa sapor, kon ko so salor ? It sur dan bona po nix, eske jekenda e fuldenda sub pedos d'omos. 
  14. Vu lo lum del mond. Un urbo situat on un bergel no par si skelat. 
  15. Nor so alumar un kandel po it ti sub un mojo, mo on un kandelil, e it dar lum a tos domye. 
  16. Liu va lum luci ante l'omos, ut zi vidu va bon opros e gloru va Patro ki sar in cel.
  17. Vu no pensu ke mi venir ut deli lo lex o lo profetos: Mi no venir ut deli, mo ut kumpi. 
  18. Den mi ve dicar verede, aslong ter e cel existor, no un yot, no un punt diparsor dal lex, us to kumpat. 
  19. Dete kelun volcor lo letesta d'et komandos, ensenande same osunos, il namator lo letesta nel cela royado: mo kelun ze far e ensenar namator grana nel cela royado. 
  20. Den mi ve it dicar, Men va driteso depasar lo driteso del taxaleros e del Farisyanos, vu nilkaze entror nel cela royado.
  21. Vu udir, priskunos dicir: No ocidu, e kelun ocidor sor in dango de jugo; 
  22. Mo mi ve dicar ke kelun irsar ver sa frat sen grun sor an in dango de jugo; e kelun dicar a sa frat "Raka" sor in dango de tribunal; mo kelun dicar: "Tu idyota" sor in dango d'inferna fok. 
  23. Dete es tu aportar ta ofrayo al altar, e es ye tu memar ke ta frat ar som rankor kontre tu: 
  24. Liu ye ta ofrayo ante l'altar e giu prime rekonsili kon ta frat, e dan tu venor fi ta ofrayo. 
  25. Akordu vit kon ta adverser van tu onvege kon il, ut il no te livru al juger, e etun al gendarmo e tu sendat prizye. 
  26. Verede mi te dicar, tu nilmode en exor, pre tu or pagat l'ultima monul. 
  27. Vu udir, priskunos dicir: tu no komitu adulter; 
  28. Mo mi ve dicar ke kelun mirar un fem kon lust ja komitar adulter in sa kor. 
  29. E es ta dexa ok falar, tu racu it e jeku it dus da tu, den mele un ta glid perat qam ta enta korpo jekat in inferno. 
  30. E es ta dexa man falar, tu kotu it e jeku it dus da tu, den mele un ta glid perat qam l'enta korpo jekat in inferno. 
  31. So dicir priske; kelun ripudyar sa fem shar di a el un divorso-akten; 
  32. Mo mi ve dicar ke kelun ripudyar sa fem, eske kauze fornik, ley pushar komiti adulter; e kelun spozar un divorsin komitar adulter. 
  33. Vu an udir, so ir dicat priske: tu no parjuror, mo tu mentenor ta juros ante Deo; 
  34. Mo mi ve dicar: Vu juru nilkaze, nor pel cel, den etun lo tron de Deo; 
  35. Nor pel ter, den etun lo pedil de Deo; nor pe Jerusalem, den etun l'urbo del gran Roy. 
  36. Nor tu juror pe ta cef, den tu no par au albi au neri un sol kaplo. 
  37. Mo siu va parlo: Ya, ya; No, no; den keloso pluda venar dal Mal. 
  38. Vu udir, so ir dicat: ok po ok, dent po dent; 
  39. Mo mi ve dicar: Vu no oponu a mal, e a kelun ve kolpar ol dexa vango vu prezentu l'osa. 
  40. E es kelun te procesar e te tular ta vest, tu ofru lu an ta mant. 
  41. E es kelun te forcar marci un milyo, tu marcu kon il du milyos. 
  42. Tu diu a ki te askar e no ditornu da ki vur loni. 
  43. Vu udir, so ir dicat: Tu amor ta vezun e odor ta nemik; 
  44. Mo mi ve dicar: Vu amu va nemikos, benedu ki ve maledar, fiu ben a ki ve odar, e pregu po zi ki ve spicar e persekar. 
  45. Ut vu siu l'infanos de va Patro ki sar In cel: den il far luci la solyo ol malas e ol bonas, e sendar pluv ol justa e ol maljusta. 
  46. Den es vu amar nur zi ki v'amar, ka va merit ? No far same mesme lo taxaleros ? 
  47. E es vu salutar nur va fratos, ke far vu plu qam osunos ? No far same mesme lo taxaleros ? 
  48. Vu dete siu perfa, as sar perfa va Patro ki sar in cel. 
6)
  1. Atensu no almoni ante l'omos ut si vidat pe zi, ose vu or nil rikom-penso da va Patro ki sar in Cel. 
  2. Dete, van tu almonar, no trombu ante tu, as far l'ipokritas nel sina-gogos e nel strados, ut si glorifat pel omos. Verede mi ve dicar, zi ja ar sa rikompenso. 
  3. Mo van tu almonar, tu liu ta linka man ignori lo ke lo dexa far; 
  4. Siu ta almon sekra; e ta Patro ki vidar ine sekro Tlself te rikompensor ample. 
  5. E van tu pregar, tu no sor as l'ipokritas: den zi libar pregi stare nel sinagogos e nel ukos del strados, ut si vidat pel omos. Verede mi ve dicar; zi ar ja sa rikompenso. 
  6. Mo tu, van tu pregar, entru in un kamet, e klozu lo pordo e pregu ta Patro ki ye in sekro, e ta Patro ki vidar ine sekro te rikompensor ample. 
  7. Mo van vu pregar, no utu vana ripos, as paganos far; den zi krar zi sor udat dank za mul vortos. 
  8. Dete vu no siu as zi, den va Patro spar ka kozos vu nesar pre vu Lu askar. 
  9. Dete vu pregu ete: ' Na Patro ki sar in Cel, siu ta nam santat.
  10. Venu ta regno. Siu ta vol fat on ter, asben in Cel. 
  11. Ne diu oje na shakida pan. 
  12. E pardonu na debos as nos pardonar na deberos. 
  13. E tu no ne induku in tentado, mo ne fridu da mal; den tua sar Royado, poso e glor, po sem. Amen. 
  14. Den es vu pardonar a osunos za malaktos, va cela Patro an ve pardonor. 
  15. Mo es vu no pardonar a osunos za malaktos, nor va Patro pardonor lo vuas. 
  16. Inotre van vu junar, no siu, as l'ipokritas, tristaspa: den zi se difigurar, ut so vidu zi junar. Verede mi ve dicar, zi ar ja sa rikompenso. 
  17. Mo tu, van tu junar, ungu ta cef e lavu ta vizo: 
  18. Ut tu no aspu junanda ante omos, mo ante ta Patro ki sar ine sekro; e ta Patro, ki vidar in sekro, te rikompensor ample. 
  19. Vu no amasu tresoros on ter, vo tarmos e rust korompar, e vo ladros efrangar e furtar; 
  20. Mo amasu po vuself tresoros in cel, vo nor tarmos o rust korompar e vo ladros no efrangar e furtar. 
  21. Den vo va tresoros, ye sor an va kor. 
  22. L'ok sar lo lum del korpo; dete, es ta ok sana, ta enta korpo sor plena de lum. 
  23. Mo es ta ok malsana, ta enta korpo sor in darko. Dete, es lo lum ine tu darka, kan grana sor et darko! 
  24. Nilun par sirvi du mastros; den au il odor l'un e amor l'osa, au il afektor etun e spicor l'osa. Vu no par sirvi Deo e Mamon. 
  25. Dete mi ve dicar: no zorgu pri va viv, ke vu edor o ke vu bevor o ke vu weror. No sar viv plu qam karno e korpo plu qam vest ? 
  26. Vu miru Fezos erye: zi nor semenar o rakoltar, nor amasar zi in grenaros; dok va cela Patro ze nutrar. No valar vu plu qam zi ? 
  27. Ki de vu pur, pe kel esfort, adi un inco a sa statur ? 
  28. E kur zorgar vu pri vest ? Miru lo lilyos nel feld, kom zi kreskar: zi no laborar o filar. 
  29. E dok mi ve dicar ke Salomon ilself in sa plen glor no sir vestat as un d'et lilyos. 
  30. Donk, es Deo vestar ete l'erbo nel feld, erbo ki oje sar e kras sor jekat al ofno, cu no ve vestor il deste plu, omos pokfida ? 
  31. Dete, no ve preokupu, dicande: Ke edor nos ? o: Ke bevor nos ? o: Kom ne vestor nos ? 
  32. (Den lo paganos kirar toet kozos) mo va cela Patro spar ke vu nesar toeto. 
  33. Mo vu kiru prime lo royado de Deo, e la rekteso: e toeto ve sor adat. 
  34. Dete no zorgu pri kras: krasyo zorgor po itself. A shak id sufar sa pen. 
7)
  1. No jugu, ut no si jugat. 
  2. Den pel jugo ke tu far tu sor jugat; e pel mezur ke tu utar tu sor mezurat. 
  3. E kur vidar tu lo polvogren nel ok de ta frat sen atensi al plankon ki sar in ta prop ok ? 
  4. E kur var tu dici a ta frat: Me liu tuli lo polvogren da ta ok, dun, miru, ye un plankon in ta ok ? 
  5. Tu ipokrita, tulu prime lo plankon da ta ok; e dan por tu vidi klare e tuli lo polvogren dal ok de ta frat. 
  6. Vu no diu kozos santa al kanyos; nor jeku va perlos ante porkos, ut zi no ze fuldu sub sa pedos e doe volvu e ve ataku. 
  7. Asku, e so ve dor; kiru, e vu trovor; klopu e so ve apror. 
  8. Den kelun askar ricar, e ki kirar trovar; e a ki klopar so aprar. 
  9. O sar ye un om inte vu, a ki la filyo askar pan, e il dor a il un petro ? 
  10. O es il askar un pesh, il dor a il un serpo ? 
  11. Es donk vu, gre vu mala, spar kom di regalos a va infanos, kanplue va cela Patro dor a ki lu askar ? 
  12. Dete tot bon kozos ke vu vur osunos fiu a vu, vu fiu same a zi: den tala lo lex e lo profetos. 
  13. Entru pel enga pordo: den larga lo pordo e ampla lo veo ki dukar a pero e mulunos ye entrar. 
  14. Den enga lo pordo, e enga lo veo ki dukar a viv, e pokunos it trovar. 
  15. Pargu da falsa profetos, ki venar a vu in vestos d'agno, mo ki ine sar lupos voraca. 
  16. Vu ze rikonor pe za frutos. Cu omos kolgar uv da spinos, o figos da karducos ? 
  17. Same shak bon arbo dar bon frut; mo un arbo putra dar mal frut. 
  18. Un bon arbo no par di mal frut, nor par un arbo putra di bon frut. 
  19. Kel bon arbo ki no dar bon frut sar sogat e jekat al fok. 
  20. Dete pe za frutos vu ze rikonor. 
  21. No shakun ki me dicar: Sinyor, Sinyor, entror nel cela royado, mo il ki far lo vol de ma Patro ki sar in cel. 
  22. Mulunos me dicor yenide: Sinyor, Sinyor, ar nos no profetat taname ? e taname pelat dyablos ? e taname fat mul marva kozos ?
  23. Mo dan mi zu dicor: Mi ni ve konir; giu veg da mi, vu ki komitar iniqados.
  24. Dete kelun askoltar ma dicos e ze aplikar, mi le komparor a un vir saga, ki bildir sa dom on un rok.
  25. E pluv shendir, e inondos venir, e ventos soplir, e kolpir lo dom, e lo dom no kadir; den it sir bildat on rok.
  26. E kelun udar ma dicos e no ze aplikar sor komparat a un dumun ki bildir sa dom on sablo. 
  27. E pluv shendir, e inondos venir, e ventos soplir, e kolpir lo dom, e it kadir. E grana sir lo ruin. 
  28. E oxir, Jesu endinde sa diskorso, ke jensos sir impresat pe la doktrin; 
  29. Per il ensenir as somun anda autorit, e no as lo taxaleros. 
(Neo-versyon pe D. S. B. ) 

No comments:

Post a Comment